2018-02-27
Moldova KİV-də Xocalı soyqırımı barədə məqalədə dərc olunub.

Xocalı soyqırımının 26-cı il dönümü ilə əlaqədar Moldovanın aparıcı "Tribuna" xəbər portalında Azərbaycanın bu ölkədəki səfiri Qüdsi Osmanovun məqaləsi dərc olunub.

Məqalədə 1992-ci il fevralın 25-dən 26-na keçən gecə erməni silahlı qüvvələrinin keçmiş sovet ordusunun Xankəndidə yerləşən 366-cı motoatıcı alayın köməyi ilə Xocalı şəhərinin yer üzündən silinməsi, mülki əhalinin, o cümlədən uşaq, qadın və qocaların amansızlıqla qətlə yetirilməsi və erməni quldurların azərbaycanlılara qarşı törətdikləri cinayətlərdən bəhs olunur.

Müəllif yazır: " İyirmi altı il - olanları həm siyasi-strateji, həm mənəvi-etik nöqteyi-nəzərdən qiymətləndirmək,  bütün sülhsevər dairələr ilə birgə perspektivdə bu dəhşətli faciədən nəticələr çıxartmaq,  o cümlədən aqressiya aktlarının, soyqırımın və insaniyyətsizliyin qarşını almaq üçün yetərli müddətdir.

Dağlıq Qarabağ münaqişənin həllinə toxunan səfir, beynəlxalq hüququn norma və prinsiplərinə əsaslanaraq  ölkəmizin mənafeyinə uyğun şəkildə sülh yolu ilə həll olunması istiqamətində Azərbaycan Respublikasının Prezidenti İlham Əliyevin rəhbərliyi altında aparılan səyləri vurğulayıb. Bundan əlavə, məqalədə 1990-ci illərdə 1 milyon azərbaycanlının öz doğma tarixi torpaqlarından qovulması, Azərbaycanın erməni təcavüzkar ölkə tərəfindən iyirmi faiz ərazisinin işğalı, BMT Təhlükəsizlik Şurasının Ermənistanın işğal etdiyi Azərbaycan torpaqlarından qeyd-şərtsiz çıxarılmasını tələb edən 4 qətnamənin qəbul olunması və bu sənədlərin Ermənistan tərəfindən yerinə yetirilməməsi barədə bəhs olunur.

Eyni zamanda, müəllif Azərbaycanda hökm sürən mədəniyyətlər arası həmrəylik, milli-mənəvi  və dini tolerantlıq, xalqımızın tərəfdaşlıq və dostluq ənənələrinə sadiqliyini və ölkəmizin dünyada təhlükəsizlik və sülh naminə prinsipial mövqeyini vurğulayaraq, Xocalı soyqırımına beynəlxalq səviyyədə ədalətli hüquqi-siyasi qiymətin verilməsinin və bu cinayətin təşkilatçılarının cəzalandırılmasının vacibliyini vurğulayır.

Məqalənin mətni ilə aşağıdakı linkdən tanış olmaq mümkündür:

http://tribuna.md/ru/2018/02/26/ru-сегодня-в-азербайджане-отмечается-26-г/

növbəti xəbər əvvəlki xəbər